Zwee rezent Projeten vun der Minett UNESCO Biosphere ginn Hand an Hand, fir d’Konsequenze vun enger weiderer Hausse vun den Temperaturen, déi duerch de prognostizéierte Klimawandel ze erwaarden ass, ofzefierderen. Déi viru kuerzem ofgeschloss D’Stadklima-Analys vun der PRO-SUD Regioun, déi rezent ofgeschloss ginn ass, confirméiert de Pilotprojet, deen am Kader vum europäeschen Interreg-Projet „Cool Neighbourhoods“ zu Déifferdeng soll ëmgesat ginn.

De Klimawandel erhéicht de Risiko, datt eis Stied sech no an no an urban Hëtztinselen verwandelen. Wann d’Temperaturen klammen, multiplizéieren sech dës Hëtztinselen duerch d’Betonflächen, an eis Quartiere gi méi desagreabel. Dat ass eng vun den Haapt- a dréngendsten Erkenntnisser aus der Stadklima-Analys, déi fir all d’Gemengen an eisem Biosphärereservat gemaach gouf. Mat Bléck op dës Erausfuerderung huet sech eis Regioun engem innovativen europäesche Projet ugeschloss: Cool Neighbourhoods.

 

E Konsortium fir eis urban Raim nei ze gestalten

Stellt Iech Quartieren fir, an deenen d’Bekämpfung vun der Hëtzt, déi vu Gebaier ausgestraalt gëtt, eng gemeinsam Erausfuerderung ass. Genausou gesäit d‘Visioun vum Projet Cool Neighbourhoods aus, deen 12 international Partner aus Holland, der Belsch, Frankräich a Lëtzebuerg zesummebréngt. Am Contraire zu traditionelle Strategien fir urban Hëtzt ze bekämpfen, fokusséiert dëse Projet sech op déi lokal Spezificitéiten. Néng Pilotberäicher goufen ausgewielt, déi dräi Typen vu Quartieren duerstellen: dicht urban Stadzentren, Gréngzonen a wirtschaftlech benodeelegt Quartieren.

Op méi wéi 30.000 m² ëffentlecher Fläch an néng Stied an Nordwesteuropa solle Mesuren ëmgesat ginn, fir méi resilient urban Liewensraim ze schafen.

Déifferdeng: Upassungsmoossnamen duerch Stadklima-Analys confirméiert

An der Minett UNESCO Biosphere wäert Déifferdeng de Virreider vun dëser urbaner Transformatioun ginn. De Projet start fir mat engem Aktiounsplang fir den Hëtztstress am Zentrum vum Déifferdenger Stadkär ze reduzéieren. Doduerch gëtt eng ekologesch Erausfuerderung an enger Chance fir déi urban Entwécklung transforméiert. De prognostizéierte Klimawandel wäert déi betraffen Quartieren an de nächste Jore méi staark mam Hëtztstress konfrontéieren.

Fir dëse Schwieregkeeten entgéintzewierken, gëtt mat finanziellem Support vum „Cool Neighbourhood“-Interreg-Projet eng gréng Mauer un der Fassad vun der Schoul am Déifferdenger Stadzentrum installéiert. Dëse Projet ass net nëmmen eng ästhetesch Léisung, mee eng reell ökologesch Infrastruktur, déi dozou bäidréit, déi lokal Temperatur ze reduzéieren, d’Loftqualitéit ze verbesseren an déi jonk Generatioun fir Ëmweltfroen ze sensibiliséieren.

Parallel dozou wäerte mer als Biosphärereservat d‘Stad dobäi ënnerstëtzen, e Bildungsprogramm iwwert dës gréng Mauer auszeschaffen. Duerch d’Installatioun vu thermeschen Sensoren sollen d’Awunner e bessert Verständnis iwwert d’Mechanisme vun der urbanner Erwiermung entwéckelen.

Méi wéi just Ofkillung: Eng Zukunftsvisioun

Den Cool Neighbourhoods-Projet geet awer wäit iwwer déi reng Bekämpfung vu Hëtzt eraus. Et geet ëm eng holistesch an transformativ Visioun vun eisen urbanen Raim. D’Zil ass et, Stied ze schafen, déi net nëmmen wärend enger Hëtzwell méi liewenswäert sinn, mä och d’Biodiversitéit an de urbanen Zone ze fërderen. Dëst ass eng vun de wichtegste Moossnamen, déi d’Wëssenschaftler an der Stadklima-Analys identifizéiert a beschriwwen hunn.

Fir d’Liewensqualitéit an den urbane Gebidder ze verbesseren, sinn d‘Schafe vun neie Gréngflächen a vu Waasserflächen zentral Elementer vun enger zukünfteger Stadplanung an eiser Regioun. Mat der ofgeschlosser bioklimatescher Analys an de lafende Klimaupassungsprojeten ënnert dem Label „Cool Neighbourhoods“ kann d’Visioun vun enger resilienter Stad an noer Zukunft an d‘Realitéit ëmgesat ginn.

D’Effekter vun der grénger Mauer, déi d’nächst Joer zu Déifferdeng gebaut gëtt, ginn am Kader vun der Interreg-Kollaboratioun wëssenschaftlech ausgewäert an deenen aneren 10 Gemengen an der Minett UNESCO Biosphere zur Verfügung gestallt, fir och do urban Klimaupassungsmoossnamen ëmzesetzen. Esou kënnen dës Mesuren e realen a positiven Impakt op d‘Liewensqualitéit vun de Bierger hunn.