Handele fir de Klima: De Wandel vun der Regioun gestalten

Ugesiichts vun der Klimakris ass Näischtmaache keng Optioun. De Gemengesyndikat PRO-SUD huet dat erkannt an sech en ambitiéisen Aarbechtsprogramm ginn, deen op zwee Grondpiliere baséiert: déi drastesch Reduzéierung vun eisen Zäregasemissiounen an d’Stäerkung vun eiser Widderstandsfäegkeet (Resilienz) vis-à-vis vun den Auswierkunge vum Klimawandel, deen een elo scho ka spieren.

Eist éischt grousst Zil ass d’Klimaneutralitéit bis 2050. Fir dat z’erreechen, gouf 2023 d’„Missioun Net Zero“ an d’Liewe geruff. Dat ass méi wéi just en Zil; et ass eng kollaborativ Approche, déi d’Gemengen zu konkreten Themen, wéi déi nohalteg Hëtzen oder d’Transitioun vum Kultursecteur zesummebréngt, fir wierksam Léisunge fir d’Emissiounsreduzéierung ze fannen an ëmzesetzen.

Dossier Wärmepompel

eLo – Den Interregprojet ATRACT-AB

Gläichzäiteg musse mir eis upassen.

D’Klimaresilienz ass eisen zweete Pilier. Dëst geschitt duerch innovativ Projete wéi déi regional bioklimatesch Etüd. Dës gouf 2024 fäerdeggestallt an ass elo e wesentlecht Instrument zur Decisiounshëllef, fir datt all nei urban Entwécklung positiv zum thermesche Confort vun den Awunner bäidréit an esou Hëtztinsele bekämpft. Mir schoulen déi kommunal Servicer an hirer Uwendung an erfuersche Léisunge fir en dynamesche Monitoring vun de moossbare Changementer.

De grenziwwerschreidende Projet „Cool Neighbourhoods“, dee vun Interreg ënnerstëtzt gëtt, illustréiert dës lokal Approche perfekt. Andeems mir eis op besonnesch vulnerabel Quartiere konzentréieren, setze mir konkret Léisungen ëm, wéi zum Beispill eng 100 m² grouss gréng Mauer an engem Schoulhaff zu Déifferdeng. Mat Hëllef vu Sensoren an engem, fir de Projet entwéckelten, „Liewensqualitéitsindex“ miesse mir wëssenschaftlech d’Auswierkunge vun eise Moossnamen, fir se wierksam multiplizéieren ze kënnen.

Bioklimatesch Etüd

Interreg Projet “Cool Neighbourhoods”

Schliisslech ass d’Zesummenaarbecht de Motor vun eisem Handelen. Eis regional Austauschplattform huet et am Joer 2025 erméiglecht, 11 Reuniounen zu sou villfältegen Theme wéi der doucer Mobilitéit – mam Projet „Missing Links“, deen d’Besoine vu Cycliste kartograféiert – oder dem Ëmweltmanagement z’organiséieren.

Andeems mir zesummeschaffen, eis op d’Wëssenschaft baséieren an d’Bierger abannen, erleide mir de Klimawandel net, mee gestalten aktiv eng nohalteg a resilient Zukunft fir d’Südregioun.