2️⃣0️⃣2️⃣5️⃣ Lokal Produiten a Biodiversitéit

D’Minett UNESCO Biosphere entwéckelt hiren Territoire

Am Kampf géint de Klimawandel an de globale Verloscht vu Biodiversitéit handelt d’Minett UNESCO Biosphere konkreet, fir d’Widderstandsfäegkeet vun hirem Territoire ze stäerken. Am Joer 2025 hu vill Projeten eis Ambitioun illustréiert, den Urbanismus, d’Erhale vun den Ökosystemer an d’Valoriséierung vun de lokale Ressourcë mateneen ze verbannen.

De Projet Tutti Frutti ass e perfekt Beispill dofir. Andeems mir kommunal Bongerte fir de Public zougänglech maachen, bekämpfe mir d’Liewensmëttelverschwendung, stäerken d’Verbindung tëscht den Awunner an hirem Patrimoine a schafe kill Noerhuelungsinselen an eise Stied. Déi interaktiv Kaart vum Projet, op där iwwer 2.600 Beem verzeechent sinn, gouf dëst Joer 48 % méi oft besicht ewéi nach 2024, e Beweis fir d’Begeeschterung bei de Bierger. De Projet inspiréiert esouguer eis franséisch Noperen, mat deene mir eng grenziwwerschreidend Kaart vun ëffentleche Bongerte virbereeden!

2025 waren eis Deeg vun der Biodiversitéit an der Geodiversitéit nees e grousse Succès. Eist Fréijoersevenement, dat elo “Nature & More” heescht, huet duerch eng nei Kommunikatioun e méi breeden an diversifizéierte Public ugezunn. Wat den Dag vun der Geodiversitéit betrëfft, sou huet dësen, obschonns e wéinst enger Wiederwarnung op en aneren Datum geréckelt gouf, eng Rekordbedeelegung verzeechent, wat de wuessenden Interessi vum Public un eisem natierlechen a geologesche Patrimoine beweist.

Tutti Frutti

Nature & More

Nieft der Bio- a Geodiversitéit stäerke mir eis lokal Produzenten!

D’Ënnerstëtzung vun de lokale Produzenten ass eng aner vun eise Prioritéiten. Och wann de Projet vun engem grousse Produzentebuttek um Territoire vun der Minett UNESCO Biosphere just lues virugeet – well d’Produzenten zwar hiren Interessi bestätegen, awer och déi finanziell Risike gesinn – begleede mir si weiderhin. De Gemengesyndikat PRO-SUD ass bereet, d’Kommunikatioun vun dëser zukünfteger innovativer Geschäftsiddi z’ënnerstëtzen, déi eng richteg Vitrinn fir eist Biosphärereservat kéint ginn.

Gläichzäiteg stäerke mir d’Bezéiunge bannent Lëtzebuerg. Eis Visitt an der Nordstad am Oktober war eng Geleeënheet, hir lokal Initiativen, wéi de Buttek OnPerfekt, deen d’Liewensmëttelverschwendung bekämpft, oder de Liewensmëttelpunkt-Buttek zu Waarken z’entdecken. Dësen Austausch beräichert eis eege Strategie, besonnesch fir d’Mark “Mmmh…Minett!”, där hiren Hunneg aus lokale Beiestäck mëttlerweil am Supermarché ze kafen ass an esou e méi breede Public erreecht.