D’Geschichte vun den Awunner vun enger Regioun, zesummegefaasst vun dräi Schrëftsteller, déi vu béide Säite vun der Grenz kommen, ginn op der Bün zum Liewen erwächt, fir eng authentesch Geschicht vum klenge Duerf Thil tëscht Villerupt an Hussigny-Godbrange z‘erzielen.

Mat Hëllef vum Interreg-Projet ATRACT-AB wëllen d‘ Communauté de Communes Pays Haut Val d’Alzette, d’Minett UNESCO Biosphere an d’Stad Esch-Uelzecht eng Strategie fir den ökologeschen a soziale Wandel vum Kultursecteur um Territoire vun Esch2022 – Europäesch Kulturhaaptstad definéieren. Am Kader vun dësem Interreg-Projet ginn op béide Säite vun der Grenz verschidde Manifestatiounen organiséiert, déi sech un de Richtlinne fir ökologeschen a soziale Wandel orientéieren, déi am deem dräi Joer laangen europäesche Projet entwéckelt ginn.

Eent vun dësen Evenementer ass de „Stammdësch“. Den éischte „Stammdësch“ erlaabt et, dat klenge Duerf Thil (nei) z‘entdecken. De Projet, dee vum grenziwwerschreidende Schrëftstellerkollektiv „Le Gueuloir“ fir d’Joer vun der Kulturhaaptstad initiéiert gouf, gëtt bis 2026 fir dräi nei Abenteuer an dräi verschiddenen Uertschaften nees erwächt.

Am September erlieft am Dezember verzielt

Déi éischt Editioun vun dësen neie „Stammdëscher“ war tëscht dem 23. an dem 28. September 2024. D’Schrëftstellerin Laure Roldàn an d’Auteure Jeff Schinker a Serge Basso De March hunn sech fir eng Woch am Café Le Penalty zu Thil néiergelooss, fir ze lauschteren, ze beobachten an Temoignagen ze sammelen.

Si hunn d’Awunner vum isoléierten Duerf Thil am Häerz vun der Grenzregioun Alzette-Belval getraff. Als „Friemer“ si se zu Stammgäscht um selwechten Dësch ginn, hirem „Stammdësch“, wou se ville Leit begéint sinn, fir perséinlech Wierder a Liewensgeschichten ze sammelen. Ronderëm dësem „Treffpunkt“ huet Le Gueuloir d’Stëmme vun de Bierger gesammelt, déi urban Legenden, Comptoirsgeschichten a lokal Erënnerunge gedeelt hunn.

No hirer Residenz an dësem Bistro – dem eenzege Café am Duerf, deen nach op ass – haten d‘Auteuren ee Mount Zäit, fir een oder méi Bünentexter ze schreiwen. Den Theaterregisseur Jean Boillot, fréieren Direkter vum NEST, wäert dës Texter mat Liewe fëllen, andeems hien se mat Acteure verzielt an se de 6. Dezember 2024 am Café Le Penalty opféiert.

Dës Inzenéierung vum „Stammdësch“ vun Thil ass en eemolegt Evenement, wat een net verpasse soll. D’Virstellung fänkt um 19 Auer un an den Entrée ass gratis.