Tëscht Stol, Erënnerung a Solidaritéit

D’Geschicht vum Minett ass net nëmmen eng Geschicht vu Minnen, Héichiewen a Stol. Et ass och eng Geschicht vu Mënschen: vu Schmelzaarbechter, vu Familljen, vu Kolonien, vu Solidaritéit, vu schwéierer Aarbecht — an dovun, wéi eng ganz Regioun duerch d’Industrie gepräägt ginn ass. Fir de 50. Episod vum Minett Mash-Up si mir op enger Plaz, wou déi Geschicht nach haut ganz konkret ze spieren ass: am Schmelzaarbechter Musée um Site vun der Metzeschmelz.

Eis “Minett-Location” vum Mount: Schmelzaarbechter Musée, Metzeschmelz

De Schmelzaarbechter Musée läit um Site vun der fréierer Metzeschmelz, engem industriellen Terrain, deen iwwer méi wéi ee Joerhonnert d’Liewe vun Esch, Schëffleng an der ganzer Minettregioun matbestëmmt huet. Wärend ronn 130 Joer huet d’Stolindustrie um 60 Hektar grousse Site Esch-Schëffleng Geschicht geschriwwen; bis zu 2.600 Persounen hunn do geschafft, ier 2012 all Aktivitéit opgehalen huet.

De Musée erzielt dës Geschicht net aus enger distanzéierter Perspektiv, mä aus där vun de Leit, déi hei geschafft a gelieft hunn. Hei geet et ëm den Alldag an der Schmelz, ëm Handwierksgeschier, Aarbechtsmaterial, perséinlech Géigestänn, Fotoen, Dokumenter an Erënnerungsstécker, déi zesummen e Bild vun enger ganzer Aarbechterkultur zeechnen.

Entstanen ass d’Sammlung net als grousst institutionellt Projet, mä aus enger Initiativ vu Leit, déi mat dëser Welt verbonne waren. Wéi den Alain Guenther sech erënnert, huet alles mat engem Kaffiskränzchen ugefaangen, bei deem Leit aus de Kolonië ronderëm d’Schmelz Saachen ernimmt hunn, déi si nach doheem haten: en Hummer, eng Zaang oder aner Géigestänn aus der Schmelz. Esou ass no an no eng Sammlung entstanen.

Mat de Joren ass dës Kollektioun ëmmer méi grouss ginn. Fréier Schmelzaarbechter, hir Familljen an och d’Arbed hu Géigestänn zur Verfügung gestallt oder gespent. Haut ginn am Musée Objeten ausgestallt, déi un d’Aarbecht, d’Liewen an d’Zäit virun, wärend an no der Industrialiséierung erënneren.

Eise Gaascht: Alain Guenther

Dës Kéier ass den Alain Guenther eise Gaascht. Hien huet selwer um fréieren Arbed-Site Esch-Schëffleng geschafft an ass haut ee vun de Leit, déi sech dofir asetzen, datt d’Erënnerung un d’Schmelzaarbechter net verluer geet.

Hie kennt d’Schmelz net nëmmen aus Bicher oder Archiven. Hien huet selwer um Arbed-Site zu Esch-Schëffleng geschafft. Genee dës perséinlech Verbindung mécht säi Bléck op de Musée an op d’Geschicht vun de Schmelzaarbechter esou wäertvoll.

Am Episod schwätze mir mat him iwwer säin eegene Wee an d’Welt vun der Schmelz, iwwer säin alleréischte Schaffdag, iwwer dat, wat hien a senger Carrière am meeschte gepräägt huet, an iwwer seng Zäit als President vun der Personaldelegatioun vun ArcelorMittal. Dobäi geet et net nëmmen ëm technesch oder ekonomesch Froen, mä virun allem ëm Mënschen: ëm Aarbechtskonditiounen, Kollegialitéit, Konflikter, Verantwortung a Solidaritéit.

E wichtege Sujet ass och d’Fro, ob mat de leschte Generatioune vu fréieren Aarbechter och vill Geschichten a perséinlech Erfarunge verschwannen. De Musée ass dowéinst net just eng Sammlung vu Saachen, mä och eng Sammlung vu Stëmmen, Erënnerungen an Erliefnesser.

Dësen Episod freet dofir och, wat et bedeit, wann eng Industrie, déi eng Regioun iwwer Generatioune gepräägt huet, lues a lues verschwënnt. Ass dat just eng wirtschaftlech Transformatioun? Oder och e kulturelle Broch? Wat geschitt mat enger kollektiver Identitéit, wann déi Plazen, wou se entstanen ass, hir Funktioun verléieren?

© Minett UNESCO Biosphere

Eise Quiz

Wéini huet de Generalstreik vun 1942 ugefaangen?

1. 30. August 1942
2. 31. August 1942*
3. 9. September 1942

 

Am Schmelzaarbechter Musée steet e mat Léift gebastelte Modell vun der Seelbunn, déi fréier vun Ëtteng op Déifferdeng gaangen ass. Wéini ass déi original Seelbunn ageweit ginn?

1. am September 1898
2. am Oktober 1906*
3. am Juni 1920

 

Links bei d’Sujete vun dësem Episod:

• Schmelzaarbechter Musée: Background Informatiounen iwwer d’Geschicht vun der Schmelz Esch-Schëffleng a vum Musée.
• Aarbechterkolonien zu Schëffleng:  Quartier wou d’Schmelzaarbechter doheem waren, deen haut zur historescher Bausubstanz vu Schëffleng gehéiert.
• Ferro Forum: Veräin, deen d’Erënnerung un d’Aarbecht an d’Techniken aus de Lëtzebuerger Schmelze lieweg hält an deen och um Site vun der Metzeschmelz ass
• OGBL: Lëtzebuerger Gewerkschaft an där den Alain Guenther aktiv war.
• Generalstreik vun 1942:  Den 31. August 1942 hunn Aarbechter a ganz Lëtzebuerg, wat deemools vun Nazi-Däitschland besat war, gestreikt. De Protest hat sech géint den dekretéierten Zwangsrekrutement vu Lëtzebuerger Männer aus de Joergäng 1920-24 geriicht.

 

Kontaktéiert eis: