Industriegeschicht, Eisebunn a kollektiivt Gediechtnes 

Wat bleift vun enger Fabrick, enger Eisebunnsstreck oder engem Beruff, wann d’Gebaier verschwannen an déi lescht Zäitzeien hir Geschichten net méi selwer erziele kënnen? Fotoen, Dokumenter an Erënnerunge ginn dann zu wäertvollen Zeie vun enger industrieller Vergaangenheet, déi Lëtzebuerg an de Minett bis haut präägt. 

Am 54. Episod vum Minett Mash-Up treffe mir de Jean-Marie Ottelé, President vun industrie.lu a Webmaster vun industrie.lu a rail.lu. Mat him schwätze mir iwwer seng Passioun fir d’Industrie- an d’Eisebunnsgeschicht, iwwer den Opbau vu sengem digitalen Archiv an iwwer d’Bedeitung vun de Mënschen hannert de Maschinnen, Fabricken a Schinnen. 

Eis “Minett-Location” vum Mount: den CNCI um Belval 

Fir dësen Episod ass de Minett Mash-Up beim Centre National de la Culture Industrielle, kuerz CNCI, um Belval op Besuch. Eng passend Plaz fir e Gespréich iwwer industriellt Ierwen an d’Fro, wéi d’Erënnerung u fréier Sitten, Techniken an Aarbechtswelte fir déi nächst Generatioune ka weidergi ginn. 

Déi eigentlech Location vum Mount ass dës Kéier awer bal virtuell: de World Wide Web. Säit Enn vun den 1990er Jore sammelt a strukturéiert de Jean-Marie Ottelé Informatiounen, Dokumenter a Biller iwwer d’Eisebunns- an d’Industriegeschicht vu Lëtzebuerg an der Groussregioun. Säin digitale Projet weist, wéi eng privat Passioun no an no zu engem ëmfangräichen Archiv ka ginn. 

Am Podcast geet et ëm d’Ufäng vun dësem Projet, déi éischt Sammlung an d’Entwécklung vun de Websäiten industrie.lu a rail.lu. Mir froen och, wouhier déi vill Informatiounen a Fotoe kommen a wéi dacks haut nach wäertvoll Dokumenter op engem Späicher oder beim Opriichte vun engem Haus entdeckt ginn. 

Eise Gaascht: Jean-Marie Ottelé 

De Jean-Marie Ottelé ass Informatiker, President vun industrie.lu an e passionéierte Kenner vum industriellen a vum Eisebunnspatrimoine. Als Webmaster vun industrie.lu a rail.lu dokumentéiert hien d’Geschicht vu Betriber, Sitten, Schinnen, Maschinnen a Beruffer, déi d’wirtschaftlech a sozial Entwécklung vu Lëtzebuerg matgepräägt hunn. 

Hannert dësem Archiv stinn awer net nëmme Gebaier an technesch Anlagen. Et geet och ëm d’Fraen a Männer, déi do geschafft hunn, ëm hir Beruffer, hir Aarbechtskonditiounen an hir perséinlech Geschichten. Am Gespréich kucke mir dofir och op Beruffer, déi haut verschwonne sinn, op de fréieren Aarbechtsalldag an op d’Plaz vun de Fraen an der Industriegeschicht. 

D’Eisebunn spillt dobäi eng besonnesch Roll. Hir Entwécklung ass enk mat där vun der Stolindustrie an der Transformatioun vum Land verbonnen. Historesch Strecken, Fotoen, Dokumenter an Temoignagen  hëllefen, dës Zesummenhäng ze verstoen an Informatiounen iwwer verschwonnen oder ëmgebaut Sitten ze erhalen. 

Zum Schluss geet de Bléck an d’Zukunft: Wat soll nach dokumentéiert ginn? Wéi kënnen esou digital Archiver weidergefouert ginn? A wéi kann een déi nächst Generatioune fir d’Industrie- an d’Eisebunnsgeschicht vu Lëtzebuerg begeeschteren? 

© Minett UNESCO Biosphere

Eise Quiz: 

Den 31. Juli 1864 gouf zu Lëtzebuerg déi éischt Aarbechterorganisatioun gegrënnt. Aus wéi enger Beruffsspart koum si? 

1. Biergaarbechter 
2. Schouster 
3. Buchdrécker 

 

A wéi engem Joer gouf déi éischt Eisebunnslinn zu Lëtzebuerg ageweit? 

1. 1848 
2. 1859 
3. 1871 

 

Op industrie.lu gëtt et och eng Säit mam Titel „Industrie a Konscht“. Do fënnt een de Cover vun der BD „De Stolen A. – D’Geschicht vun der Arbed a Billersträifen“ vum Roger Leiner a Lucien Czuga. Bei wéi enger Geleeënheet gouf dës Geschicht erzielt? 

1. 1982, fir 100 Joer Eisenhütten-Aktien-Verein Düdelingen 
2. 1991, fir den 80. Joresdag vun der Ofkierzung ARBED 
3. 1997, fir déi lescht Schicht um Héichuewe B um Belval 

 

Links bei d’Sujete vun dësem Episod:

• industrie.lu – Digitaalt Archiv iwwer d’Industriegeschicht vu Lëtzebuerg an doriwwer eraus. 
• rail.lu – Informatiounen, Dokumenter a Biller iwwer d’Eisebunnen zu Lëtzebuerg an an der Groussregioun.

 

Kontaktéiert eis: