De Projet ass Enn Abrëll virugaange mat engem Workshop, deen op d’Ausschaffe vun enger Sensibiliséierungscampagne fir d’Ekosystemer an d’Biodiversitéit vun der Minett UNESCO Biosphär fokusséiert war.

An hirem Klassesall war et d’Zil vun dësem Workshop, d’Schüler aus der École Internationale Gaston Thorn an e kollaborative Prozess anzebannen, fir zesummen ze brainstormen, ze gestalten a wierkungsvoll Weeër ze plangen, fir anerer iwwer déi lokal Biodiversitéit vum Minett z‘informéieren. D’Animateure vum Atelier hunn d’Schüler duerch strukturéiert Aktivitéite geleet, fir Sujeten, Zilgruppen a Presentatiounsmethoden ze definéieren, an dobäi Kreativitéit a kritescht Denken ze fërderen.

Lass gaangen ass et mat engem Block an deem d’Ziler vum Dag definéiert goufen. Duerno ass e séiere Resumé vun de vergaangene Sessiounen an den Observatiounen um Terrain gemaach ginn, éier d’Schüler zesumme gebrainstormt hunn, fir interessant Sujeten z’identifizéieren. Op Post-its hunn si duerno Iddien a Fakten iwwer d’Biodiversitéit oder Geschicht vum industrielle Patrimoine notéiert, woubäi änlech Themen zesumme gruppéiert goufen, fir déi grouss Sujeten ze definéieren.

© Minett UNESCO Biosphere

Duerch eng Ofstëmmungsronn mat Sticker hunn sech d’Schüler op véier Theme limitéiert, aus deene véier kreativ Projeten an de Wochen duerno entstoe sollten. Eng Klassendiskussioun huet uschléissend potenziell Zilgruppen identifizéiert, déi fir méi Kloerheet op der Tafel vum Klassesall opgelëscht goufen. Duerno hunn d’Schüler kreativ Presentatiounsusätz exploréiert, an Iddie wéi QR-Code-Entdeckungsparcoursen oder interaktiv Quizzer virgeschloen. D’Machbarkeet gouf op Basis vum kuerzen Zäitraum vun nëmmen 3 bis 4 Wochen, dem Equipement, dem Budget an der Erreechbarkeet vum potentielle Publikum bewäert. Mat enger leschter Ofstëmmung sinn déi Iddien zeréckbehalen, déi duerno realiséiert goufen.

D’Schüler hunn sech op Basis vun hiren Interessen an Aarbechtsgruppen opgedeelt, déi jeeweils vun engem Facilitateur ënnerstëtzt goufen. Dës Gruppen hunn d‘Kärbotschaften, den Inhalt an d‘Presentatiounsformater definéiert. An engems konnten esou Kohärenz a Machbarkeet vun de Projeten evaluéiert ginn.

D’Resultater vun dësem Workshop waren héich encouragéierend. De partizipative Charakter huet et de Schüler erlaabt Verantwortung z’iwwerhuelen, an hir Kreativitéit ze stëppelen. Duerch dëse partizipativen Atelier hunn d’Schüler net just e Verständnis vun der Minett UNESCO Biosphär kritt, mee och hir Fäegkeete wéi Teamwork, Kommunikatioun a Projectmanagement verbessert, an domat eng zolidd Basis fir de leschten Deel vum Projet geluecht.