Op véier Plazen um Territoire vun der Minett UNESCO Bisophere gëtt an den nächsten Deeg nees d’Musek gefeiert. Véier Gemengen aus dem Süde vu Lëtzebuerg maachen 2023 bei der Fête de la Musique mat: Déifferdeng, Diddeleng, Käerjeng a Käl-Téiteng.
30. Fête de la Musique zu Diddeleng
Diddeleng ass déi Stad am Land, déi am längste scho bei der Fête de la Musique dobäi ass. Entstanen ass d’Konzept vu gratis Concert um Owend vun der Sommersonnenwende an de spéiden 1970er a fréien 1980er. Déi éischt offiziell Editioun vun enger Fête de la Musique gouf den 21. Juni 1982 a Frankräich organiséiert.
An den 1990er gëtt d’Iddi och zu Diddeleng opgegraff an d’Fête de la Musique an hei ass och all Joers déi gréissten Editioun a ganz Lëtzebuerg. Dëst Joer start d’Evenement mat engem Prelude, dee vun den Amis de l’orgue an der Diddelenger Kierch organiséiert gëtt. De Freideg, 16. Juni ass do um 20.00 Auer en Uergelconcert mat jonke Museksschüler aus dem Conservatoire du Nord.
De Samschdeg, 17. Juni, steet dann dee ganze Stadkär vun Diddeleng am Zeeche vun der Musek. Op net manner ewéi 12 Büne wäerten iwwer 50 national an international Museker, Bands an DJen Diddeleng zu klénge bréngen.
De ganze Programm opzezielen wier ze vill, hei just e puer Beispiller vun Artisten, déi zu Diddeleng fir Stëmmung suerge wäerten:
Déifferdeng invitéiert e Freideg
E Freideg den Owend proposéiert Déifferdeng direkt zwee Concerte fir d’Fête de la Musique. Rendez-vous ass am ale Stadhaus vun 19:30 un.
3 Deeg Musek zu Käerjeng
D’Gemeng Käerjeng ass an dësem Joer och bei der Fête de la Musique op der Landkaart ze fannen. D’Harmonie Municipale vu Bascharage invitéiert a proposéiert op 3 Owenter Optrëtter vu Museksschoulen, Band, Fanfaren an Orchesteren. De Rendez-vous ass vum 16. bis den 18. Juni op der Claus Cito Plaz.
Käl rockt den Dag selwer
De richtegen Dag vun der Fête de la Musique ass den 21. Juni. Genee op deem Owend invitéiert d’Gemeng Käl-Téiteng op de Parking Brill fir net manner ewéi véier Neo-Blues a Punk Concerten ze genéissen.