UNESCO ernennt 26 nei Biosphärereservater

An engem historesche Schrëtt fir de globalen Naturschutz huet d’Organisatioun vun de Vereenten Natioune fir Erzéiung, Wëssenschaft a Kultur (UNESCO) 26 nei Biosphärereservater an 21 Länner designéiert.

Dës bedeitend Erweiderung, déi de 27. September 2025 zu Hangzhou a China ugekënnegt gouf, ass déi gréisst zanter zwee Joerzéngten a steigert d’Gesamtzuel vun de Sitten am Weltnetz vun de Biosphärereservater op 785 an 142 Länner.

Dës historesch Decisioun mécht, datt zanter 2018 eng Millioun Quadratkilometer Naturgebidder an d‘Weltnetz bäikomm. Dës hunn eng Surface, déi der Gréisst vu Bolivien entsprécht. Iwwert den „Man and the Biosphere“-Programm sinn elo 5% vum Planéit geschützt, wouvun déi bal 300 Millioune Mënschen, déi an dësen eenzegaartege Regioune liewen, direkt profitéieren.

6 Länner kréien hiert éischt Biosphärereservat

D’Erweiderung ëm 26 nei Biosphärereservater markéiert e wichtege Moment, woubäi sechs Natiounen – Angola, Äquatorialguinea, Dschibuti, Island, den Oman an Tadschikistan – hir alleréischt Biosphärereservater begréissen. An enger besonnesch bemierkenswäerter Designatioun ass de ganzen Territoire vu São Tomé e Príncipe elo e Biosphärereservat.

D’Biosphärereservater vun der UNESCO si méi wéi just geschützte Gebidder; si si „lieweg Laboratoiren“, déi sech der Harmonie tëscht dem Schutz vun der Biodiversitéit an hirer nohalteger Notzung verschriwwen hunn. Dës Sitten si vu kritescher Wichtegkeet fir de Schutz vun engem bedeitenden Deel vun der globaler Biodiversitéit, dorënner iwwer 60% vun den terrestresche Wierbeldéierenaarten a liewenswichtege Küstenekosystemer. Si déngen als Piliere fir eng nohalteg Entwécklung, andeems se Initiativen, déi vun der lokaler Populatioun gedroe ginn, an innovativ Léisunge fërderen, déi den Ëmweltschutz mat lokale Liewensgrondlagen an Aklang bréngen.

Angola – Quiçama (Source: Shutterstock)

Äquatorialguinea – Isla de Bioko (© Justin Jay)

Dschibuti – Archipel des 7 frères (Source: UNESCO)

Island – Snaefellsnes (Source: Shutterstock)

Wärend dem 5. Weltkongress vun de Biosphärereservater huet d’UNESCO-Generaldirektesch Audrey Azoulay d’Dynamik vum Programm a seng kritesch Roll bei der Bewältegung vun de klimateschen Erausfuerderunge betount. „An dëse Reservater ginn all Dag nei Weeër ausgeschafft, fir den Naturschutz mat nohaltege Liewensgrondlagen an Aklang ze bréngen“, sot si.

Dës Erweiderung ass e wichtege Schrëtt a Richtung vum globalen Zil vu Kunming-Montreal, bis 2030 30% vun de Land- a Mieresfläche vun der Äerd ze schützen. Mat engem Bléck no vir huet d’UNESCO all Memberstaat opgeruff, bis 2035 op d’mannst ee Biosphärereservat anzeriichten, an domat de globalen Engagement fir de Opbau vun enger nohalteger Zukunft fir Mënsch an Natur ze stäerken.