De 5. Weltkongress vun de Biosphärereservater, „Biosphere 2025“, ass vum 22. bis de 26. September 2025 zu Hangzhou a China.

Ziler a Bedeitung

D’Haaptzil vum Kongress ass et, eng harmonesch Bezéiung tëschent dem Mënsch an der Ëmwelt ze fërderen an als Plattform fir global Zesummenaarbecht am Beräich vun der ökologescher Nohaltegkeet ze déngen. Dëse Meeting ass déi wichtegst international Reunioun vum UNESCO-Programm „Man and the Biosphere“ (MAB), enger intergouvernementaler wëssenschaftlecher Initiativ, déi an den 1970er-Jore gegrënnt gouf, fir d’Relatiounen tëscht dem Mënsch a senger lokaler Ëmwelt ze verbesseren.

Ee vun de Schwéierpunkte vum Kongress ass d’Finaliséierung an d’Adoptioun vun der neier MAB-Strategie an engem Aktiounsplang. Dëse Plang wäert d‘Basis fir d’Entwécklungsstrategië vun den nächsten zéng Joer vun de méi ewéi 730 Biosphärereservater weltwäit liwweren an déngt als Leetfuedem fir d’Zukunftsaarbecht vum MAB-Programm. Et gëtt erwaart, dass dëst Evenement och déi international Kooperatioun an d’Partnerschafte beim Naturschutz stäerkt.

Programm a Aktivitéiten

De fënnef Deeg laange Kongress huet eng ëmfaassend Agenda, mat enger Ouverture, Plenière-Sëtzungen, Parallel-Foren, Netzwierk-Renconteren a weideren Eventer. D’Haapttheme sinn:

• Biodiversitéit, Wëssenschaft a Bildung: Presentatioun vun den neiste wëssenschaftlechen Avancen a Bildungskonzepter fir de Schutz vun der Biodiversitéit.
• Optimiséiere vu Partnerschaften an d’Finanzéierung vun de Biosphärereservater: Diskussiounen iwwer d’Stäerkung vun der Zesummenaarbecht an eng laangfristeg Finanzéierung vun de Biosphärereservater
• Stäerke vu globale, regionale an thematesche Reseauen: Verbesserung vun der Zesummenaarbecht an der Effektivitéit tëschent de verschiddenen Netzwierker vu Biosphärereservater.
• Dialog tëscht Biosphärereservater: Eng Plattform fir oppen Diskussiounen an de Wëssensaustausch tëschent de Participanten aus der ganzer Welt.

Nieft de formelle Reunioune ginn och Visitte vu regionale Biosphärereservater ugebueden, wou d’Participanten Naturschutzbeméiungen a China selwer kenne léiere kënnen. Am Lin’an Ecological Museum gëtt et zousätzlech eng Ausstellung mat Material aus dem MAB-Programm.

Lëtzebuerger Participatioun

Hangzhou, wou d’Konferenz ass, ass bekannt fir seng natierlech Schéinheet a säin Engagement am Beräich Ëmweltschutz. Zu Hangzhou ass mat der Minett UNESCO Biosphere och eng éischte Kéier e Lëtzebuergescht Biosphärereservat vertrueden. Beim leschte Weltkongress vun de Biosphärereservater zu Lima, war Lëtzebuerg nach net Member vum weltwäiten MAB-Netzwierk. D’Minett Biosphere ass eréischt am Oktober 2020 vun der UNESCO unerkannt ginn.

Weider Informatiounen sinn op der offizieller Websäit vum Weltkongress vun de Biosphärereservater ze fannen.