De leschte Weekend hunn den Davide Sapienza, Geopoet, an de Robert Weis, Geolog, e geopoetesche Camp am rouegen an isoléierten Dierfche Lasauvage organiséiert. Matten an de südlechen Däller vun der Lëtzebuerger Minett Regioun, huet dës Plaz dee perfekte poetesche Kader fir déi zwee Spezialiste gebueden, déi hir Entdeckungen iwwer d‘Geschicht vun der Lëtzebuerger Biergbauvergaangenheet virgestallt hunn an déi jonk Participanten opgefuerdert hunn, dëst eenzegaartegt Ëmfeld op eng méi perséinlech an emotional Manéier ze erliewen.
E Freideg goufen d’Gäscht um Camp mat engem sonnege Grillowend begréisst. Déi Sonn huet den Dag drop séier dem Reen Plaz gemaach. Allerdéngs huet dat de Grupp net decouragéiert. Am Géigendeel, d’Weeër an d’Naturlandschafte sinn esou zum Liewen erwächt an déi ominéis Presenz vun de Wolleken huet zum mysteriéise Kader vun der Regioun gepasst, där hiren Numm vun der „Hex“ mam fräien a verréckte Geescht kënnt, déi viru laanger Zäit eleng an dësem Bësch gelieft huet. Inspiréiert vun dëser legendärer wëller Fra, huet de Grupp sech vu sengen Hemmunge befreit a sech op wëll a wonnerschéi Wanderungen duerch de Minièresbaseng vum Fonds-de-Gras beginn. Dëst war keng klassesch guidéiert Naturtour, mä éischter eng Rees, déi duerch Periode vu rouegen 10-Minutte Spadséiergank wéi och e Pause fir dem Davide seng geopoetesch Textliesunge getakt ginn ass.
Dës Momenter vun der Rees sollten d’Participante vum Camp encouragéieren an hiert direkt Ëmfeld anzedauchen a fir sech selwer eng emotional Geschicht ze kreéieren, déi mat deem Raum an deem Moment verbonnen ass. Egal ob et d’Entrée vun enger aller Minière ass, den Otem vu frëscher Loft op hirem Kierper, oder e klenge glänzende Weier gefëllt mat liewegen Insekten, dat ware mächteg Reflexiounsmomenter, déi d’Participante genoss hunn an déi brillant ergänzt goufen duerch dem Robert seng wëssenschaftlech Notizzen iwwert déi verschidde Sitten. Dës Notizen iwwer d’geologesch an industriell Geschicht vun der Regioun hu perfekt déi emotional Geschicht ergänzt, déi d’Participanten an hire Käpp kreéiere konnten.
Owes huet de Grupp an engem lokale Bistrot Schutz gesicht, fir engem Donnerwieder z‘entkommen an d‘Waarden op de Bus, deen se zréck an d’Auberge op d’Zowaasch bruecht huet. Eemol zréck am ëmgebaute Schoulhaus, huet de Grupp waarm Spaghettie genoss, éier den Owend an engem verschlofenen, ale Bistro an der Noperschaft viru goung, an duerno um lokale Sportsterrain ofgeschloss gouf, wou de Grupp zesumme gesongen a gedanzt huet a bis no Mëtternuecht.
De Moie vum leschten Dag ass wéi den Dag virdrunner virugaangen, iwwerdeems am Nomëtteg d’Lise Landrin de „Kommando“ iwwerholl huet, eng Geografin vun der Uni Lëtzebuerg, déi am Beräich vun der „Geography of Emotions“ schafft. An de Gemeinschaftsgäert vu Lasauvage huet d’Lise de Grupp duerch zwou Reflexiouns a Sensibiliséierungsübunge begleet. An der éischter goufen d’Memberen invitéiert sech e Partner ze sichen, fir mat enger anerer Persoun déi eng oder aner sensoresch Experienz an de Gäert z’erliewen, andeems eng vun den zwou Persounen d’Aen zougemaach huet an, ze soen, blann war. D’Partner hunn Rolle getosch an hu schlussendlech hir jeeweileg Parcoursen diskutéiert an esou zesummen eng Kaart vun hiren Erfarunge gezeechent.
Als lescht Übung am Camp gouf jidderee gefrot, fir e Site am Gaart ze wielen, deen en un e spezifescht Erliefnis aus senger Vergaangenheet erënnert a gouf encouragéiert e kuerzen Text iwwert dës Erënnerung ze schreiwen, ugefaange mat de Wierder: „Ech erënnere mech wou… „. D’Aventure vum geopoetesche Camp zu Lasauvage ass domat stilvoll ofgeschloss ginn. De Grupp huet déi richteg Essenz vun der Geopoetik kennegeléiert: eng Geschicht duerch Liewen an Emotiounen, duerch Zäit a Raum an bis an d’Liewen nom Liewen. An der Welt vu de Gefiller an den Naturerfarungen a vun sech selwer, och an der Zukunft.