A PROPOS DE NOUS

No der Stolkris an dem Verschwanne vun traditionelle Unhaltspunkte besteet de Besoin d’Ekonomie vum Süden nei auszeriichten. Zënter den 1980er Jore gëtt iwwert eng Revalorisatioun vun der Geschicht an der Erënnerung un d’Stolindustrie vun de Gemengen, nationalen Administratiounen an der Veräinswelt nogeduecht. 1989 entsteet esou d‘“Fondation Bassin Minier“, fir wëssenschaftlech, kulturell a sozial Aktivitéiten, déi dem Minett ze Gutts kommen ze initiéieren an ze begleeden.

Et ass allerdéngs eng global Approche néideg, fir déi ekonomesch, sozial an ekologesch Liewensbedingungen an der Südregioun ze verbesseren. D’Wichtegkeet eng „gemeinsam Visioun“ ze schafen, gëtt vun den ëffentlechen Acteuren erkannt. D’Fro, wat mat de Frichen, déi vun der Stolindustrie iwwereg bliwwe sinn, geschéie soll war a muncher Hisiicht den Ausléiser fir en Debat iwwert d’Zukunft vun der Südregioun. Parallel dozou existéieren awer nach aner Avantagen, déi fir d’Erstelle vun engem gemeinsamen Entwécklungsplang fir de Süde schwätzen. Déi interkommunal Zesummenaarbecht an eng grenziwwerschreidend Dimensioun fänken un lokal Acteuren z’interesséieren, déi sech Suergen ëm d‘“Liewensqualitéit vun den Awunner“ maachen. Op nationalem Plang besteet de Wëllen a punkto Landesplanung op de Wee vun enger regionaler Approche ze goen.

Divers Instrumenter fir eng regional Entwécklung gi geschaf:

Mee 1999: D’Landesplanungsgesetz vum 31. Mee 1999 encouragéiert Gemenge fir interkommunal Syndikater ze grënnen, déi eng harmonesch an nohalteg Entwécklung vun de festgeluechte Regiounen erméigleche sollen. D‘Entwécklung vum Süde gëtt vum Staat kloer prioriséiert.

Juli 1999: De Landesplanungsministère bedeelegt sech aktiv un der Kreatioun vun engem „regionalen Observatoire fir de Süden“. D’Gemengen aus der Regioun an de Ministère ënnerschreiwen eng Konventioun, duerch déi den „ORESUD“ gegrënnt gëtt, dee se gemeinsam finanzéieren. Dësen techneschen Outil am Déngscht vun de Gemenge soll d‘Ëmsetzung a Kontroll vun der regionaler Politik vun der Regierung am Beräich Statistik a Kartographie erméiglechen. Et ass e fräiwëllege Schrëtt am Beräich vun der Zesummenaarbecht tëscht de Gemengen.

2000: De Lëtzebuerger Staat an de Stolproduzent Arbed grënnen d’Entwécklungsgesellschaft Agora. Hir Aufgab ass et, déi fréier Stolsitten am Süde vu Lëtzebuerg, virop de Belval, nei ze beliewen. Et geet hei ëm d’Plangen an d’Baue vun engem modernen, dynamesche Quartier op engem Deel vum fréiere Site vun der Arbed Belval mat engem Modal Split vu 40/60 tëscht ëffentlechen Transport an Auto.

2002: De Fonds Belval gëtt gegrënnt. Als Etablissement public ass de Fonds Belval responsabel fir d’Realiséierung vun der « Cité des Sciences, de la Recherche et de l’Innovation » um Belval. De politesche Wëlle war eng Viraussetzung, fir aus dësem ale Stolsite, wou sech fir d’éischt d’Finanzindustrie mat der Dexia-BIL implantéiert huet, zum Standuert vun der Lëtzebuerger Universitéit ze maachen.

Mee 2003: E Joer drop schléisse sech d’Gemengen aus dem Lëtzebuerger Süden an engem Gemengesyndikat zesummen. D’Statute vum PRO-SUD ginn den 19. Mee 2003 ugeholl.